Dukomeje gusoma no kwiga igice cya Bibiliya buri munsi. Iga igice cyose cya 17 cy’ABACAMANZA usenga kandi uciye bugufi
Taliki 30 UGUSHYINGO 2025
📖 ABACAMANZA 17
[1] Hariho umugabo wo mu gihugu cy’imisozi miremire ya Efurayimu witwaga Mika.
[2] Yabwiye nyina ati “Bya bice by’ifeza igihumbi n’ijana wibwe bigatuma uvumana nkumva uvumana, ndabifite ni jye wabyibye.” Nyina aravuga ati “Umwana wanjye nahirwe ku Uwiteka.”
[3] Nuko asubiza nyina bya bice by’ifeza igihumbi n’ijana, nyina aravuga ati “Ni ukuri izi feza mfite mu ntoki nzereje Uwiteka, kugira ngo umuhungu wanjye azikoreshemo igishushanyo kibajwe n’igishushanyo cy’ibyuma biyagijwe, noneho ndazigushubije.”
[4] Amaze gusubiza nyina izo feza, nyina yenda ibice by’ifeza magana abiri abishyira umucuzi, azikoramo igishushanyo kibajwe n’igishushanyo cy’ibyuma biyagijwe, nuko biba mu nzu ya Mika.
[5] Kandi uwo mugabo Mika yari afite inzu yitaga iy’imana, aremesha efodi na terafimu, yereza umwe wo mu bahungu be, ngo abe umutambyi we.
Ukundwa n’Imana, amahoro abe muri wowe. Satani akomeje umugambi wo gukura abantu ku Muremyi wabo
1️⃣ IYO ABANTU BANZE UKURI BABA BANZE NA NYIRAKO
🔰 Mu mategeko Imana yatanze harimo itegeko ribuzanya kurema ibishushano
▶️ “Ntukiremere igishushanyo kibajwe, cyangwa igisa n’ishusho yose iri hejuru mu ijuru, cyangwa hasi ku butaka cyangwa mu mazi yo hepfo y’ubutaka.(Kuva 20:4)
▶️ Iyo banze ukuri baba banze na Nyirako. Iyo baribata amategeko y’Imana baba bahakanye n’Uwayatanze.
▶️Biroroshye gukora igishushanyo cy’amahame n’inyigisho by’ibinyoma nko gukora igishushanyo kibajwe mu giti cyangwa mu mabuye. Kugira ngo agaragaze imico y’Imana uko itari, Satani yoshya abantu kuyikekaho imico y’ibinyoma. Kuri benshi, ikigirwamana cy’ubucurabwenge cyarimitswe maze Imana irimurwa; nyamara Imana Ihoraho nk’uko yigaragarije mu Ijambo ryayo, muri Kristo no mu mirimo itangaje yo kurema, abayiramya ni bake gusa. Abantu ibihumbi basenga ibyaremwe ariko bagahakana Umuremyi wabyo. Nubwo ibigirwamana biri mu buryo butandukanye, gusenga ibishushanyo byiganje mu Bakristo b’iki gihe nk’uko byari biri mu Bisirayeli mu gihe cya Eliya. Imana z’abiyita abahanga, abacurabwenge, abasizi, abategetsi, abanyamakuru, imana z’abanyabukorikori, imana zo mu mashuri yisumbuye, no muri za Kaminuza, ndetse n’imana zo mu bigo by’abihaye Imana, zirushije ububi Baali, ariyo mana y’izuba yo muri Fowenike. II 568.1
2️⃣ KUVANA IBITEKEREZO BY’ABANTU KU MANA
🔰 Gusenga ibishushanyo n’imibiri y’abapfuye, kwiyambaza abatagatifu, no guha umuntu ikuzo rikwiye Imana gusa( His holiness, Sainteté), ibyo byose ni ubuhendanyi bwa Satani bwo kuvana ibitekerezo by’abantu ku Mana no ku Mwana wayo. Kugira ngo abageze mu irimbukiro, yihatira gukura intekerezo zabo k’Uwo bashobora kuboneramo agakiza gusa. Aberekeza ku kintu cyose cyashobora gusimbura Uwavuze ati:“Mwese abarushye n’abaremerewe, nimuze munsange mbaruhure.” II 555.1
3️⃣ GUHINDURA IBIHE N’AMATEGEKO
🔰 Mika yiremera ibishushanyo bisengwa, Bukeye Mika yeza umusore w’Umulewi ahinduka umutambyi we, akaba mu rugo rwe. Nuko Mika aherako aravuga ati “None menye ko Uwiteka azangirira neza, kuko mfite Umulewi ho umutambyi.” (abac 17: 12-13).
▶️ Ubupapa bwagerageje guhindura amategeko y’Imana. Itegeko rya kabiri ribuzanya kuramya ibishushanyo, ryakuwe mu mategeko y’Imana, kandi n’itegeko rya kane na ryo ryarahinduwe kugira ngo hemerwe kubahiriza umunsi wa mbere w’icyumweru nk’Isabato mu cyimbo cy’umunsi wa karindwi. Ariko impamvu yo gukuraho itegeko rya kabiri abashyigikira inyigisho z’ubupapa batanga ni uko ngo iryo tegeko atari ngombwa ko ribaho, ko rikubiye mu rya mbere, kandi bakavuga ko bigisha amategeko y’Imana nk’uko Imana ubwayo yagenye ko yumvikana. Kuri bo, bavuga ko iryo hinduka atari ryo ryavuzwe n’umuhanuzi.
▶️ Uguhindura amategeko bigambiriwe byavuzwe muri aya magambo: “Azigira inama zo guhindura ibihe n’amategeko.” Impinduka zakozwe ku itegeko rya kane zisohoza ryose ibyo ubuhanuzi buvuga. Ibyo byakozwe n’ububasha bumwe ari bwo bw’itorero. Aha rero ububasha bw’ubupapa ubwabwo bwishyize hejuru y’Imana ku mugaragaro. II 442.3
▶️ Ijambo ry’Imana riragira riti: ” Kandi ndababwira ukuri yuko ijuru n’isi kugeza aho bizashirira, amategeko atazavaho inyuguti imwe cyangwa agace kayo gato, kugeza aho byose bizarangirira. (Mat 5:18).
🛐 DATA MWIZA, TUBASHISHE GUKOMEZA AMATEGEKO YAWE UKO BIKWIYE.
Wicogora mugenzi.