Dukomeje gusoma no kwiga igice cya Bibiliya buri munsi. Iga igice cyose cya 16 cy’ABACAMANZA, usenga kandi uciye bugufi.
Taliki 29 UGUSHYINGO 2025
📖 ABACAMANZA 16:
[4] Hanyuma y’ibyo, abenguka umugore wo mu gikombe cya Soreka witwaga Delila.
[5] Abatware b’Abafilisitiya basanga uwo mugore baramubwira bati “Umuhende ubwenge, umenye aho imbaraga ze nyinshi ziva, tumenye uburyo twamushobora tukamuboha tukamucogoza, umuntu wese muri twe azaguha ibice by’ifeza igihumbi n’ijana.”
[6] Nuko Delila abaza Samusoni ati “Ndakwinginze, mbwira aho imbaraga zawe nyinshi ziva n’icyakuboha ugashoboka?”
[18] Nuko Delila abonye ko amubwiye ibyari mu mutima we byose, atuma ku batware b’Abafilisitiya ngo “Nimuzamuke iyi nkubwe gusa, kuko yambwiye ibyari mu mutima we byose.” Nuko abatware b’Abafilisitiya bamusanga aho ari, bazanye za feza.
[19] Aherako amusinzirira ku bibero maze ahamagaza umuntu kumwogosha imigabane irindwi y’umusatsi, aherako amushinyagurira, imbaraga ze zimuvamo.
[21] Abafilisitiya baherako baramufata bamunogoramo amaso, bamumanukana i Gaza bamubohesha iminyururu y’imiringa, bamugira umusyi mu nzu y’imbohe.
Ukundwa n’Imana, umunsi w’umunezero. Komeza icyo ufite hatagira ugutwara ikamba ryawe.
1️⃣ KWISHYIRA MU BUBATA
🔰 Samusoni amaze kunesha Abafilisitiya, Abisiraheli bamugize umucamanza maze ategeka ishyanga rya Isiraheli imyaka makumyabiri. Nyamara intambwe imwe itewe umuntu yerekera mu bibi itegurira inzira indi ntambwe. Samusoni yari yarishe itegeko ry’Imana ubwo yashakaga umugore wo mu Bafilistiya (noneho bari abanzi be gica) arongera abasubiramo kubwo gutwarwa n’irari ribi.
▶️ Kubwo kwishingikiriza ku mbaraga ze nyinshi zari zarateye Abafilisitiya ubwoba bwinshi, ajya i Gaza gusura umugore w’indaya yaho. Abatuye muri uwo mudugudu bamenye yuko ahari maze bashaka uburyo bakwihorera. Uwo mwanzi wabo bamukingiranira mu gihome gikomeye cyane kuruta ibindi byo mu mijyi yabo. Bumvise yuko atakibacitse maze bategereza gusa yuko bucya bakuzuza intsinzi yabo. (AA 389.4)
2️⃣ IHEREZO RY’INSHUTI MBI
🔰 Uko umunsi wahitaga undi ukaza, Delila yakomezaga kwinginga Samusoni kugeza ubwo “umutima we warembye nk’uwenda gupfa;” nyamara hari imbaraga itaragaragaraga yamugumishaga iruhande rw’uwo mugore. Amaherezo Samusoni amaze gucogora yamenye rya banga. Yaravuze ati: “Nta cyuma cyogosha cyigize kunyura ku mutwe, kuko nabaye Umunaziri w’Imana uhereye nkiva mu nda ya mama; nakogoshwa, imbaraga zanjye zanshiramo, ngacogora nkamera nk’abandi.” Ako kanya Delila yahise atuma intumwa ku batware b’Abafllisitiya ngo baze badatinze. Igihe uwo munyambaraga yari asinziriye, Delila yamwogosheho wa musatsi we mwinshi. Hanyuma, nk’uko yabigenzaga mbere incuro eshatu, Delila yaramubwiye ati: “Wapfa Samusoni; Abafilisitiya baragusumiye!”
▶️ Agikanguka yibwira ko ari bukoreshe imbaraga ze nka mbere akabarimbura; nyamara amaboko ye yari adafite imbaraga nta cyo yamumariye, maze amenya ko “Uwiteka yamuretse.” Ubwo yari yamaze kogoshwa, Delila yatangiye kumurakaza no kumubabaza, agira ngo agerageze imbaraga ze, kubera ko Abafilisitiya batashoboraga kumwegera bataramenya neza yuko imbaraga ze zashize. Nuko baramufata, maze bamaze kumunogoramo amaso ye yombi, bamujyana i Gaza. Aho ni ho yaboheshejwe iminyururu muri gereza yabo maze bamuha kujya akora imirimo iruhije. (AA 390.5)
3️⃣ INGARUKA ZO KWITESHA AGACIRO
🔰Mbega impinduka zabaye ku muntu wari umucamanza n’igikomerezwa cyo mu Bisiraheli! none ubu akaba nta mbaraga afite, ari impumyi, afunzwe, yateshejwe agaciro akoreshwa imirimo mibi cyane y’amaboko! Buhoro buhoro yari yararenze ku mabwiriza yagengaga umuhamagaro we wera. Imana yari yamwihanganiye igihe kirekire; ariko igihe yari amaze kwiyegurira ubutware bw’icyaha akamena ibanaga rye, Uwiteka yaramuretse amuvaho.
▶️ Nta kundi kuri kwari mu musatsi we muremure, ariko wari ikimenyetso yahawe cyerekana ko yubaha Imana. Ubwo icyo kimenyetso cyari cyaguranwe irari, imigisha cyari kibereye ikimenyetso nayo iba irasheshwe. (AA 392.1)
DATA MWIZA TURINDE KWISHYIRA MU BURETWA BW’ICYAHA
Wicogora Mugenzi.