Dukomeje gusoma no kwiga igice cya Bibiliya buri munsi. Iga igice cyose cya 14 cy’ABACAMANZA, usenga kandi uciye bugufi.
Taliki 27 UGUSHYINGO 2025
📖 ABACAMANZA 14:
(1)Nuko Samusoni aramanuka ajya i Timuna, abona umukobwa wo mu bakobwa b’Abafirisitiya.
(2)Maze aramanuka abwira se na nyina ati “Nabengutse umukobwa i Timuna wo mu bakobwa b’Abafirisitiyakazi none mumunsabire.
(3)Nuko se na nyina baramubaza bati “Mbese nta mugeni uri mu bakobwa ba bene wanyu cyangwa mu bwoko bwacu bwose, byatuma ujya gushaka umugeni mu Bafirisitiya batakebwe? “Nuko Samusoni abwira se ati “nsabira uwo kuko ariwe nkunda cyane. “
(4)Ariko se na nyina ntibari bazi ko byaturutse ku Uwiteka, kuko yashakaga impamvu ku Bafirisitiya, icyo gihe Abafirisitiya bari barahinduye Abisirayeli
(5)Hanyuma y’ibyo Samusoni amanukana na se na nyina bajya i Timuna, bageze mu mizabibu yaho, ahura n’umugunzu w’intare, aramutontomera.
(6)Maze umwuka w’Uwiteka umuzaho cyane, arayitanyaguza nk’uwatanyaguza umwana w’ihene, kandi nta ntwaro yari afite mu ntoki, ariko ntiyabwira se na nyina ibyo yakoze.
Ukundwa n’Imana amahoro abe muri wowe, kubaha Imana bitera imbaraga
1️⃣IMBARAGA ZA SAMUSONI ZIGENGWA NO KUBAHA IMANA
▶️Isezerano Imana yasezeranyije Manowa ryasohoye mu ivuka rya Samusoni igihe gikwiriye kigeze, uko uwo mwana w’umuhungu yakuraga, ni ko byagaragaraga yuko yari afite imbaraga z’umubiri zidasanzwe. Ibyo ntibyaterwaga n’uko yari afite imirya iboshye neza, ahubwo ni uko yari umunaziri, ubwo bunaziri bukaba bwaragaragazwaga n’umusatsi we utogoshwaga.
❇️Iyo Samusoni yumvira amategeko y’Imana, yari kugira imibereho itagira uko isa. Ariko gushyikirana n’abasenga ibigirwamana byaramwanduje.
▶️Samusoni ubwo yari amaze kuba umugabo, aricyo gihe gikomeye yari akwiriye kubera Imana indahemuka, yishyize hamwe n’abanzi b’Abisirayeli. Ntiyabajije yuko ashobora gusingiza Imana bisumbyeho aramutse ashyingiwe uwo yihitiyemo.
Abashaka kugira Imana nyambere, yabasezeranije ubwenge. Ariko nta sezerano yasezeranyije abahugira ku kwinezeza. (AApge 287)
⏩Ni kangahe abantu bashyira imbere ibyifuzo byabo iyo bahitamo umugabo cyangwa umugore! Bombi ntibasaba Imana inama cyangwa ngo babe bagamije kuyisingiza.
2️⃣INGARUKA ZO KWIFATANYA N’ABO TUDAHUJE KWIZERA
📖Ariko Uwiteka yahaye abantu be amabwiriza yuko badakwiriye kwifatanya n’abadafite urukundo rwe muri bo :kandi Kristo ahuriye he n’aberiyali, cyangwa Uwizera n’utizera bafitanye mugabane ki? Mbese urusengero rw’Imana rwahuza rute n’ibishushanyo bisengwa? (2 korint 6:15,16)
▶️satani ahora ashaka gukomeza ububasha bwe ku bantu b’Imana kugira ngo bagirane amasezerano n’abayoboke be. Kugira ngo agere kuri ibyo agerageza kubyutsa irari mu bantu.
▶️Iyo Abisirayeli na Samusoni badakurikirana Abafirisitiya ubwo yari amaze kubacamo igikuba, bajyaga kwibohora ingoyi y’uburetwa bari barabashyizeho, ariko umwuka yari yarabavuyeho maze basuzugura umurimo Imana yabategetse gukora wo kwirukana abapagani.
▶️Bari barafatanyije nabo mu mico yabo iteye isoni. Bemeye guteshwa agaciro nk’amatungo.
Bajyaga kuba barahonotse iyo bumvira Imana gusa. Ndetse n’ubwo Uwiteka yabazaniye umucunguzi, ibihe byinshi baramwanze bifatanya n’abanzi babo.
⏩Muvandimwe, Kubaha Uwiteka ni ishingiro ry’ubwenge, kandi kumenya Uwera ni ubuhanga (gan 9:10)
▶️Nawe umvira Uwiteka, yaguhaye ubwenge kugira ngo ubukoreshe mu murimo wayo .
DATA MWIZA DUHE UBWENGE TWOYE KWIFATANYA N’ABATIZERA MU IZINA RYA YESU AMEN
Wicogora Mugenzi.