Dukomeje gusoma no kwiga igice cya Bibiliya buri munsi. Iga igice cyose cya 14 cy’ITANGIRIRO usenga kandi uciye bugufi.
Tariki 30 MATA 2025.
📖 ITANGIRIRO 14
[11]Banyaga ibintu by’i Sodomu n’i Gomora n’ibyokurya byabo byose, baragenda.
[12]Na Loti bamufatirayo mpiri, umuhungu wabo wa Aburamu wari utuye i Sodomu, banyaga ibintu bye barigendera.
[13]Haza umuntu umwe wacitse ku icumu, abibwira Aburamu Umuheburayo. Yari atuye ku biti byitwa imyeloni bya Mamure Umwamori, mwene se wa Eshikoli na Aneri, bari basezeranye na Aburamu.
[14]Aburamu yumvise yuko mwene wabo yafashwe mpiri, atabarana n’umutwe we wigishijwe kurwana, bavukiye mu rugo rwe, magana atatu na cumi n’umunani barabakurikira bagera i Dani.
[15]Aburamu n’abagaragu be bigabanyamo imitwe nijoro barabatera, barabanesha, barabirukana babageza i Hoba, iri ibumoso bw’i Damasiko.
[16]Agarura iminyago yose, na Loti mwene wabo n’ibye, n’abagore na bo n’abandi bantu.
[18]Kandi Melikisedeki umwami w’i Salemu azana imitsima na vino, yari umutambyi w’Imana Isumbabyose.
[19]Amuhesha umugisha ati “Aburamu ahabwe umugisha n’Imana Isumbabyose, nyir’ijuru n’isi,
[20]kandi Imana Isumbabyose ihimbazwe, yakugabije ababisha bawe.” Nuko Aburamu amuha kimwe mu icumi cya byose.
[21]Umwami w’i Sodomu abwira Aburamu ati “Mpa abantu, ibintu ubyijyanire.”
[22]Aburamu asubiza umwami w’i Sodomu ati “Ndahirishirije Uwiteka kumanika ukuboko kwanjye, ni we Mana Isumbabyose, nyir’ijuru n’isi,
[23]yuko ntazatwara akadodo cyangwa agashumi k’inkweto ko mu byawe, kugira ngo utibwira uti ‘Ni jye utungishije Aburamu.’
Ukundwa n’Imana, amahoro abe muri wowe.
Urugamba rw’uri ku ruhande rw’Uwiteka ntirusaba umubare munini. Abantu 318 bo mu rugo rw’Umwubahamana batsinda ingabo z’abami b’isi bakomeye. Mugenzi ugana i Siyoni ihoraho waba ufite ubwoba bw’intambara zitandukanye urwana nazo buri munsi? Sigaho, tuza kandi uhumure, uruhande rw’Uwiteka ruhorana insinzi n’igihe bisa nk’ibidashoboka.
1⃣URUGAMBA RW’UMWUBAHAMANA
🔰Igikorwa cye cy’ubutwari cyamuhesheje ijambo mu moko yari amukikikije (PP 135.1)
🔰 ☆Ntiyigeze yishimira kuzirikana ukudashima kwa Loti. Urukundo yari amufitiye rwarakangutse, amaranira kumutabara.
Yabanje kugisha Uwiteka inama, ategura intambara (PP 135.1)
🔰☆ Nk’uko bisanzwe mu ntambara, iminyago ni iy’uwatsinze urugamba; ariko kuko Aburahamu yari yagabye igitero atagamije indonke, yanga kungukira ku bababaye, avuga gusa ko abo batabaranye bo bagomba kubona umugabane wabo ( PP 135.1)
➡ Abarahamu ntiyagize ati “awa, umva ingaruka zo guhitamo kwawe”, ahubwo urukundo yari afitiye Loti, rwarenze impamvu iyo ariyo yose yumvikana yashoboraga gutuma Aburahamu yifata ntatabare umuhungu wabo.
Hari igihe umuvandimwe, mwene wanyu cg inshuti, umukuraho amaboko kuko yakoze ikosa runaka. Aburahamu aduhaye isomo ryo kubabarira no gukunda abantu uko bari, bidatewe n’uko bitwaye .
👉🏾Abrahamu yanze umunyago uwo ariwo wose yagombwaga, kuko atitabiriye urugamba kubera indonke azakuramo, ahubwo kubera urukundo n’ubutabera.
Ese iyo dufasha abandi tuba tubitewe n’iyihe mpamvu? Niba ari k’ubw’inyungu tuzakuramo, twigire kuri Aburahamu, twihane.
2️⃣ICYA CUMI SI ICYACU
📖[20]kandi Imana Isumbabyose ihimbazwe, yakugabije ababisha bawe.” Nuko Aburamu amuha kimwe mu icumi cya byose. (Itang 14:20)
➡️Icya cumi Aburamu yahaye umutambyi w’Imana Melikisedeki ni icyerekana ishimwe yari afitiye Imana. Agitanga atarafata icyemezo cy’uko akoresha iminyago. Ibi bivuze ko uteganyiriza ibindi cyamaze kuvamo.
👉🏼Melikisedeki amusabira imigisha nta kiguzi asabye. Uyu munsi umushumba arasaba amafaranga ngo abone kugusengera. Ese ubwo utayafite azamusengera?
➡️Reba urwawe ruhande niba uhagaze mu byizerwa.
🛐 MWAMI IMANA, TWIGISHE KUGUHA UBUYOBOZI BW’IZO TURWANA BURI MUNSI.🙏🏾
Wicogora Mugenzi